Socios do proxecto
Asociación de Desenvolvemento Rural Mariñas-Betanzos
Mariñas-Betanzos é unha organización sen ánimo de lucro, constituída en 2008 coa finalidade de ser o núcleo de integración dos axentes territoriais, institucionais, sociais e económicos interesados en promover o territorio de actuación. A súa estratexia de desenvolvemento ten como obxectivo a valorización do territorio, incidindo na mellora da calidade de vida da poboación, a partir da posta en valor do patrimonio natural, cultural e da cohesión social. Como Grupo de Desenvolvemento Rural, xestiona a medida LEADER, enmarcada no Plan Estratéxico da PAC 2023-2027 (PEPAC) no territorio.
En 2013, a UNESCO declarou “Mariñas Coruñesas” Reserva de Biosfera, quedando así enmarcada no Programa MaB, co obxectivo de establecer un novo modelo de relación entre o ser humano e a natureza. Mariñas-Betanzos desenvolve, con carácter anual, un Programa de Educación Ambiental dirixido á comunidade escolar.
Escola Infantil Municipal A Caracola
A escola está integrada na Rede de Escolas Infantís de titularidade municipal (REIM) do Concello da Coruña, sendo xestionada pola concesionaria Dulce Comienzo, S.L. desde o ano 2008.
Está sometida á normativa vixente para as escolas de primeiro ciclo de Educación Infantil (0-3 anos) e ao Regulamento de organización e funcionamento da REIM, publicado no BOP de A Coruña o 16 de febreiro de 2023.
Conta cunha dilatada experiencia na conformación de menús ecolóxicos con produto de proximidade, así como na participación en redes temáticas a nivel estatal. Participa na iniciativa EcoComedores practicamente desde os seus inicios.
Fundación Juana de Vega
A Fundación Juana de Vega é unha entidade privada sen ánimo de lucro, creada no ano 1872, por Juana de Vega quen ao final da súa vida deixou todo o seu patrimonio para constituír a fundación co obxectivo de crear unha escola teórico-práctica de agricultura.
Hoxe en día, a Fundación continúa desenvolvendo o seu labor a favor do desenvolvemento rural de Galicia, pero adaptado á realidade e ás necesidades da sociedade actual.
As tres áreas estratéxicas de traballo da entidade son: apoio ao sector agroalimentario e forestal, innovación e investigación e paisaxe e territorio.
O obxecto desta Fundación é promover, mediante as iniciativas que estime precisas, por se soa ou en colaboración con persoas ou entidades públicas ou privadas, o coñecemento, a conservación e o desenvolvemento do medio rural de Galicia, con especial dedicación á investigación, a innovación, a formación da súa poboación activa, a preservación da súa contorna natural e cultural e a mellora da súa base económica e das actividades con ela relacionadas.
A nosa misión é por tanto mellorar a calidade de vida da poboación do medio rural, como colectivo desfavorecido, cun enfoque baseado na participación social e a innovación.